Братїслава ся вже дакілько років може похвалити прекрасным православным храмом засвяченым нашому духовному великанови, святому, равноапостольному Ростілавови. Вшыткы добрі знаме, же як раз ёму вдячіме за кiрiло-мефодїйску мiсію, котра засіяла на нашых землях православне учіня і значно приспіла к розвитку нашой културы. Резултатом їх дїла є і нами хоснованый церьковнославяньскый язык, котрый соєдинять векшыну православного світа. І як раз таке было і зложіня дакiлько стовок віруючіх в Братїславі – повно Русинів, Русів, Українцїв, Словаків ці Сербів, котры сьме вєдно ославили в недїлю 27.10.2019 праздник св. Ростіслава.
Святу літурґію одправили попри нашых домашнїх отцях духовных – деканoви мітр. прот. Йосифу Гаверчакови а Ростіславови Ґеркови і священици – Йоан Зозуляк з Топольчан, Якуб Яцечко з Голіча, Мірослав Крутьскый з Тырнавы, Марек Кундіс з Брезовoй пiд Брадлом, Лукаш Новачек з Нітры, Петро Бобак зо села Гонтяньскы Моравці і Йоан Томан з Бановець над Бебравов. Як раз послїднїй менованый прочітав св. Євангеліє (Ин 56) а в проповідї роздїлив людей на тых, што собі выбрали дорогу жывота, наслїдованя Господа Бога і тых, што ідуть дороґов смерти, інґнорованём ці аж затрачованём Ісуса Хріста. Як отець Йоан дале спомянув, были часы, коли ся і верьхность і владарї намагали вєдно із своїм жытельством іти дорогов жывота. Такым прикладом быв і св. Ростіслав, котрый пожадав і прияв од бізантьского царя Михаіла ІІІ. дорогоцінный дар – славяньске писмо. І вдяка тому Велика Морава заквітла православієм і залучіли сьме ся меджі великы народы тогдышнёго світа. Наконець нас отець Йоан закликав до утримованя вірности св. Ростіславови: „Де ся обертав св. Ростіслав а быв і выслуханый, там ся маєме обертати і мы – на Конштантінополь“.
Перед крестным ходом ся ку нам пригварив і настоятель братїславской парохії отець Йосиф Гаверчак. I він подяковав Господу Богу, же сьме ся в такій гойній кількости зышли і ославили св. Ростівлава: „Каждый народ потребує великана як быв св. Ростівлав, котрый вказав народу дорогу к Господу Богу“. Як дале продовжовав отець Йосиф і нам треба жыти подля св. Єванєлія а іти в слїдах Ісуса Хріста: „Лем тот наслїдує істинного Бога, хто є покорный, чує ся негодным і просить Господа Бога о одпущіня“.
Наконець пасує спомянути слова владыкы Николая Велиміровіча, котрый о нашім богатстві – кірiліцї повів: „Святе є то, што святы люде вытворили а кiрiлiцю вытвторили святы братя Кiрiл і Мефодiй“. Заховайме і мы, што є нам близке і охраняйме то, што сьме дістали до дару.
Святый Ростіславе, моли Бога за нас!
Йосиф Бадида, ОЗ молоды.Русины
(языкова коректура – Анна Кузмякова)
Фото: Ярослав Сушко
